‘एखाद्या गावच्या भक्त-मंडळींनी, माझी मान्यता घेऊन, पारायण सप्ताहात माझे प्रवचन आयोजित केले की मी ज्या श्लोक-ओवींवर प्रवचन देण्याचे निश्चित करीन, त्यावर ध्यान लावून परब्रह्माकडून प्रथम मंजुरी घेत असे. त्यानंतर त्याचे प्राथमिक लेखन करीत असे. दोन-तीन दिवस हे ब्राह्म-मुहूर्तावर माझ्या परमात्म्याच्या नित्य पूजनानंतर करीत असे. ज्या दिवशी ते प्रवचन द्यायचे, त्याच दिवशी त्याचे लेखन सकाळीच पूर्ण झालेले असायचे. ध्यानयोगाद्वारे परमात्म्याकडून त्यांची अंतिम मंजुरी घेत असे. त्यावर त्याच दिवशी दिनांकांकित सही करीत असे. मग सायंकाळी नियोजित वेळेवर ते प्रवचन, मंजुरीचे कागद बरोबर न नेताच देत असे व ते भक्तजनांना अतिशय आवडत असे. प्रथम कागदावर लिखाण केल्याने कोठे काय बोललो, हे लिखित स्वरूपात राहत असे. त्यानंतर ते कागद फाईल केले जात असत. अशा रीतीने दिलेली प्रवचने संग्रहित होत गेली ‘

हरिभक्त परायण दिनकर यांचे वडील ब्रह्मीभूत हरिभक्त परायण रंगरावस्वामी यांचे जीवन ज्ञानेश्वरीमयच होऊन गेले होते. त्यांच्या समाधीस्त होण्यानंतर हरिभक्त परायण दिनकर यांना जे साक्षात्कार श्रीमद्गीता ज्ञानेश्वरी संदर्भात मिळाले,  त्यामुळे त्यांचे जीवनही ज्ञानेश्वरीमयच होऊन गेले. हरिभक्त परायण दिनकर विरचित ‘ श्री भक्ती श्रीहरीप्राप्ती मुक्ती ‘  ग्रंथात दहाव्या अध्यायात तीन खास ओव्यात श्रीमद ज्ञानेश्वरी ची महती त्यांनी गायली आहे. श्रीमद्गीता ज्ञानेश्वरीवर प्रवचन देण्याचा अधिकार संतश्रेष्ठ माऊली ज्ञानेश्वर महाराज यांनीच हरिभक्त परायण दिनकर यांना दिला आहे. संतश्रेष्ठ ज्ञानेश्वर महाराजांनी भगवद्गीतेचे संस्कृतबद्ध असे महान ज्ञान जनसामान्यांना समजावे म्हणून ते प्राकृत मराठीत ओवीबद्ध रूपात श्रीमद ज्ञानेश्वरीच्या रूपाने साकार केले. संत ज्ञानेश्वर महाराजांचे भक्त असलेले हरिभक्त परायण दिनकर यांनी संत ज्ञानेश्वर महाराजांच्या श्रीमद ज्ञानेश्वरीतील ज्ञान ज्ञानेश्वर महाराजांच्याच आशीर्वादाने प्रवचनांच्या स्वरूपात जनसमुदायासमोर मांडले.

सर्वधर्मीय संत महात्म्यांच्या उल्लेख आणि ज्ञानाने समृद्घ अशी ही वैशिष्ट्यपूर्ण प्रवचने अध्यात्मशास्त्रातील सर्व प्रवाहांना समाविष्ट करून घेतात. किंबहुना, सर्व संत सज्जन महात्म्यांनी हरिभक्त परायण दिनकर यांना या ज्ञानाचा समावेश आपल्या प्रवचनांमध्ये करण्यासाठी अनुमतीच दिलेली आहे.  प्रत्यक्ष शेकडोंच्या जनसमुदाया समोर दिलेली प्रवचने ही तर ज्ञात आहेतच, परंतु बऱ्याचदा घरी येणाऱ्या मित्रपरिवार भाविक भक्त, जिज्ञासू ,नातेवाईक यांच्याशी सहज वार्ता करत असताना हरिभक्त परायण दिनकर यांनी अध्यात्मशास्त्रावर केलेले सहज निरूपण हे सुद्धा एखाद्या प्रवचन सेवेइतकेच व्याप्त होऊन राहत असे.

हरिभक्त परायण दिनकर यांना विविध अखंड हरिनाम सप्ताह, सामुदायिक पारायण सोहळे यामध्ये प्रवचन सेवेसाठी सतत निमंत्रण येत असत. त्यांच्या प्रवचनांचे श्रवण करताना भाविक मंत्रमुग्ध होत असत . काहीतरी अलौकिक श्रवण केल्याचा त्यांना प्रत्यय येत असे. शासकीय सेवेतील कर्तव्य बजावत असताना हरिभक्त परायण दिनकर यांनी ही प्रवचने दिली आहेत. प्रवचन सेवेनंतर त्यांनी कोणत्याही स्वरूपात मानधन घेतलेले नाही. ईश सेवेसाठी आणि जनसेवाहितार्थ हे सर्व कार्य त्यांनी अमानित्व भावाने केले आहे.